काठमाडौँ– २०७७ सालमा विभिन्न विपद्जन्य घटनामा ५९२ जनाले ज्यान गुमाएका छन् ।

गएको वैशाख १ गतेदेखि चैत ३१ (आज) सम्ममा विभिन्न ४ हजार १५७ वटा विपदजन्य घटनामा ५९२ जनाले ज्यान गुमाएका हुन् ।

सोही अवधिमा विभिन्न घटनामा परी ११ सय ६७ जना घाइते भएका राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।

यो एक वर्षमा पहिरोमा परी ज्यान गुमाउनेमा सबैभन्दा बढी रहेको प्राधिकरणको तथ्यांकमा उल्लेख छ । पहिरोमा परी ३०१ जनाको मृत्यु भएको छ । अझै ६४ जना बेपत्ता छन् । यसैगरी आगलागीका घटनामा परी ९७ जना, चट्याङ लागेर ७० जना, सर्पको टोकाइबाट २१ जना र विभिन्न जनावरले आक्रमण गर्दा ३७ जनाको ज्यान गएको प्राधिकरणले जनाएको छ ।

यो एक वर्षमा बाढीमा परेर ४२ जनाले ज्यान गुमाएका छन् ।