काठमाडौँ – कांग्रेस सांसद गगन थापाले रोजगारीका लागि दक्षिण कोरिया जानका लागि भाषा परीक्षा (ईपीएस) पास गरेर जान नपाएकाहरूलाई तत्काल जाने वातावरण बनाउन सरकारसँग माग गरेका छन् ।

संसदको शून्य समयमा बोल्दै सांसद थापाले कोरिया जानका लागि भाषा परीक्षा पास गरेका २ हजार बढी युवा कोरिया जान नपाएको भन्दै सरकारको ध्यानाकर्षण गराएका हुन् ।

उनले भने, ‘चमत्कारी सरकार न केही सोच्छ न केही गर्छ । दक्षिण कोरिया जाने २ हजार नेपाली कामदार महिनौँदेखि काठमाडौँमा यत्रतत्र छरिएर बसेका छन् । फिलिपिन्स, म्यानमार र श्रीलंकाको सरकारले गरेको जस्तै गरेको भए नेपालीहरू उहिलै जाने थिए । सम्बन्धित मन्त्रालयले सदनलाई जानकारी गराउन माग गर्दछु ।’