काठमाडौँ– नेकपा माओवादी केन्द्रका सांसद देवेन्द्र पौडेलले प्रधानमन्त्री केपी शर्मा ओलीले नैतिकता देखाउन पर्ने बताएका छन् ।

उनले प्रधानमन्त्रीले विश्वासको मत किन नलिएको भन्दै प्रश्न पनि उठाएका छन्। पौडेलले प्रधानमन्त्री आफैंले विघटन गरेको प्रतिनिधिसभा पुन:स्थापना हुँदा पनि नैतिकता देखाउनुनपर्ने हो? भनी प्रश्न गरेका हुन्।

उनले सबै राजनीतिक दलहरुसँग छलफल गरेर संसद्लाई सक्रिय बनाउन प्रधानमन्त्रीलाई आग्रह गरे। सरकारले बिजनेस नदिएर फेरि विघटनलाई पुष्टि गर्ने काम नहोस् भन्दै उनले संविधान बनाउन आफूहरुको पनि योगदान रहेकाले संविधान नसिकाउन आग्रह गरे।

उनले भने, ‘संसद् र संसदीय समितिमा प्रतिनिधित्व गर्ने कुरा हामीलाई पनि थाहा छ । यो संसद् काम छैन भन्‍ने सरकारको धारणा हो भने यो लोकतन्त्रविपरीत हुनेछ। संसद्लाई जनताको कुरा सुन्‍ने थलो बनाइयोस्।’