काठमाडौँ– काठमाडौँ उपत्यकासहित देशभर पछिल्लो समय वायु प्रदूषण उच्च भई अत्यन्त घातक अवस्थामा पुगेको छ। काठमाडौँ विश्वकै सबैभन्दा प्रदूषणयुक्त शहरको सूचिमा पहिलो नम्बरमा पुग्दासमेत सरकारले प्रदूषण नियन्त्रणका लागि गम्भीर चासो र तत्परता नदेखाएको विवेकशील साझा पार्टीले आरोप लगाएको छ ।

नेपालको संविधानले हरेक नागरिकले स्वच्छ र स्वस्थ वातावरणमा बाँच्न पाउने हकको सुनिश्चित गरे पनि सरकारले ध्यान नपुर्‍याएको विवेकशील साझाले जनाएको छ ।

पार्टीले आज एक विज्ञप्ति जारी गर्दै वर्षा र पश्चिमी वायुको गति हाम्रो अधीनमा नरहे पनि हालको प्रदूषणका प्रमुख कारक देशका अधिकांश स्थानमा लागेको डढेलो तथा धुवाँ-धुलो न्यूनीकरणमा तत्काल परिणाममुखी काम गर्न सरकारलाई सुझाव दिएको छ ।

संघ, प्रदेश र स्थानीय सरकारबिच समन्वय गरी सामुदायिक समूहहरूको समेत साथ लिएर सेना र प्रहरीलाई आवश्यक उपकरणसहित डढेलो नियन्त्रणमा अविलम्ब खटाउन विवेकशील साझा पार्टी आग्रह गरेको छ ।

डढेलो नियन्त्रणका लागि अन्य मुलुकले उपयोग गरिआएको हेलिकप्टरबाट रसायन छर्किनेसहितका प्रविधिको उपयोगबारे पनि तत्काल तयारी अघि बढाउन पनि आह्वान गरेको छ ।