टोकियो– जापानकी ख्यातीप्राप्त फिल्म लेखक सुगाको हासिदाको ९५ वर्षको उमेरमा निधन भएको छ । उनले लेखेको टेलिभिजन सिरिज ‘ओसिन’ विश्वव्यापी लोकप्रिय मानिन्छ ।

इण्डियन एक्सप्रेसमा प्रकाशित समाचार अनुसार यसै वर्षको सुरुवातदेखि अस्वस्थ रहँदै आएकी उनको लिम्फोमाका कारण निधन भएको हो ।

‘ओसिन’की अभिनेत्री पिन्को इजुमीले लेखक हासिदाको गत आइतबार उनको पश्चिमी टोकियोस्थित अटामीमा निधन भएको बताइन् ।

कोरियामा सन् १९२५ मा जन्मिएकी उनी सन् १९३० ताका जापान गएकी थिइन् ।

जापान पुगेपछि उनी सन् १९४९ मा सोचिकु फिल्म स्टुडियोमा आबद्ध भइन् । यो स्टुडियो छोडेपछि उनले आफूलाई स्वतन्त्र स्क्रिप्ट लेखकका रुपमा उभ्याइन् ।

उनले लेखेको ‘ओसिन’ सन् १९८३ देखि १९८४ सम्मा जापानको एनएचके पब्लिक टेलिभजनमा प्रसारण भएको थियो । यो सिरिजमा एक जापानी महिलाको बायोग्राफी देखाइएको छ । जसले जापानको प्रख्यात सुपरमार्केट चेनको स्थापना गरेकी थिइन् ।

‘ओसिन’ विश्वका करिब ६० बढी देशमा प्रसारण भएको थियो । हासिदाले लेखेको अन्य प्रख्यात सिरिजमा ‘वातारु सेकेन वा ओनी बाकरी’, ‘मेकिङ इट थ्रु’ थियो ।