काठमाडौं–छिमेकी राष्ट्र चीनको राजकीय भ्रमणमा रहेकी राष्ट्रपति विद्यादेवी भण्डारी आज (बुधबार) स्वदेश फर्कंदैछिन् । स्वास्थ्यमा समस्या देखा परेपछि राष्ट्रपति भण्डारीले एक दिन भ्रमण छोट्याएर स्वदेश फर्कंने भएकी हुन् ।

परराष्ट्रमन्त्रालय स्रोतका अनुसार उनी बिहान १०: ४० बजे काठमाडौं आइपुग्ने छिन् । भ्रमणका क्रममा बेइजिङबाट ल्हासा पुगेकी भण्डारी त्यहीबाट स्वदेश फर्कंने छन् ।

यसअघिको भ्रमण तालिका अनुसार राष्ट्रपति भोलि (बिहीबार) एयर चाइनाको उडानबाट स्वदेश फर्कंने कार्यक्रम थियो । तर, स्वास्थ्यमा आएको खराबीका कारण सिचुआन एयरलान्सको उडानबाट स्वदेश फर्कंने कार्यक्रम बन्यो । राष्ट्रपतिको स्वास्थ्यका कस्तो समस्या आएको भन्ने खुलेको छैन ।

राष्ट्रपतिको पूर्वनिर्धारित कार्यक्रम अन्तर्गत आज पोटाला र जोखाङ दरबार भ्रमण गर्ने, कृषि परियोजना अवलोकन गर्नेलगायत तय भएको थियो ।