काठमाडौँ– स्वास्थ्य तथा जनसंख्या मन्त्री हृदयेश त्रिपाठीले पहिलो चरणको दोस्रो डोज खोप आगामी बैशाख ७ देखि ११ गतेसम्म लगाइने बताएका छन् ।

सोमबार संसदमा बोल्दै उनले पहिलो मात्रा कोभिड-१९ विरुद्धको खोप लगाएकाहरुलाई २०७८ बैशाख ७ गतेदेखि ११ गतेसम्म दोस्रो मात्रामा कोभिसिल्ड खोप प्रदान गर्ने बताएका हुन् ।

उनले पहिलो चरणमा खोप लगाएकाहरुका लागि पुग्ने खोप सुरक्षित तरिकाले भण्डारण गरेर राखिएको उनले बताए ।

नेपालमा कुल जनसंख्याको ६ प्रतिशतभन्दा बढी मानिसहरूले खोप लगाइसकेको जानकारी उनले दिए ।

यसभन्दा अगाडि खोप लगाउन नपाएका इच्छुक अग्रपंक्तिमा खटिने व्यक्तिलाई चैत्र २५ गतेदेखि चीन सरकारबाट उपलब्ध भेरोसेल खोप लगाउने कार्यक्रम रहेको उनले जानकारी दिए ।

पछिल्लो समय पुनः कोरोना संक्रमितको संख्या बढ्न थालेको हुँदा उच्च स्वास्थ्य सुरक्षा अपनाउन पनि उनले सबैमा आग्रह गरे ।
उनले भने, ‘संक्रमण पुन बढ्दै गइरहेको छ, अबका दिनमा जनस्वास्थ्यका मापदण्ड पालनालाई प्रभावकारी बनाउन सकिएन भने संक्रमण बढ्दै जेठ असारमा अर्को उच्च विन्दुमा पुग्नसक्छ ।’