एजेन्सी – फ्रेन्च लिग वानको च्याम्पियन्स टोली पेरिस सेन्ट जर्मेन (पीएसजी) मोन्टपेल्लिरसँग पराजित भएको छ । मंगलबार राति भएको लिग वानको खेलमा पीएसजी मोन्टपेल्लिरसंग ३–२ गोल अन्तरले पराजित भएको हो ।

मोन्टपेल्लिर घरेलु मैदानमा शुरुवाति अग्रता लिएको पीएसजीले अग्रता जोगाउन नसक्दा हार व्यहोर्नु परेको हो । खेलको १२ औं मिनेटमा मोन्टपेल्लिरका एम्ब्रोइस आयोङगोको आत्मघाती गोलबाट पीएसजीले अग्रता बनाएको थियो । तर, खेलको १५ औं मिनेटमा पीएसजीका प्रेस्नेल किम्पेम्बेको आत्मघाती गोलबाट मोन्टपेल्लिर खेलमा फर्किएको थियो ।

खेल १–१ गोलको बराबरी हुँदा ६२ औं मिनेटमा एन्जल डी मारियाले गोल गर्दै पीएसजीलाई २–१ को अग्रता दिलाए । तर, मोन्टेपेरिल्लाका लागि ८० औं मिनेटमा एन्डी डिलोर्टले गोल गर्दै खेल २-२ को बराबरीमा ल्याए ।

मोन्टेपेरिल्लाका लागि खेलको ८५ औं मिनेटमा सौलुमाने कामराले गोल गर्दै टोलीलाई ३–२ को जित दिलाएका थिए ।

पराजित पीएसजी यसअघि नै लिग च्याम्पियन बनिसकेको छ । जितसंगै मोन्टपेल्लिर ५४ अंकसहित लिगको पाँचौ स्थानमा उक्लिएको छ । पराजित पीएसजी ८४ अंकसहित शीर्ष स्थानमा यथावत छ ।