काठमाडौं – एएफसी यु–१९ महिला च्याम्पियनसिप छनोट अन्तर्गत दोस्रो चरणको छनोट खेलको अन्तिम खेलमा नेपाल आयोजक म्यानमारसँग पराजित भएको छ । मंगलबार बेलुकी भएको खेलमा नेपाल घरेलु टोली म्यानमारसँग २–१ गोल अन्तरले पराजित भएको हो ।

अन्तिम खेलमा समेत हार व्यहोरेपछि नेपाल अंक तालिकामा खाता खोल्न नपाउँदै घर फर्किएको छ । मण्डलेस्थित मण्डलर थिरी स्टेडियममा खेलमा शुरुवाती अग्रता लिएको नेपालले आफ्नो अग्रता जोगाउन नसक्दा हार व्यहोरेको हो ।

खेलको ३९ औ मिनेटमा मनिषा राउतले पेनाल्टीमा गोल गर्दै नेपाललाई सुरुवाती अग्रता दिलाएकी थिईन् । प्रिति राईमाथि म्यानमारका खेलाडीले पाउल गरेपछि नेपालले पेनाल्टी पाएको थियो ।

राईमाथि फाउल गर्ने म्यानमारकी या ओले रातो कार्ड पाउँदा घरेलु टोली १० खेलाडीमा समेटिएको थियो । तर, खेलको ४७ औं मिनेटमा म्यानमारकी सान थावले गोल गर्दै म्यानमारलाई खेलमा फर्काएकी थिईन् । त्यसपछि मे फु कोले गोल गर्दै म्यानमारलाई २–१ को अग्रता दिलाइन् भने उनकै गोल नेपालविरुद्ध जीत दिलायो ।

पहिलो खेलमा अष्ट्रेलियासंग ११–१ गोल अन्तरले हारेको नेपालले दोस्रो खेल उज्वेकिस्तानसँग ४–० ले गुमाएको थियो । अस्ट्रेलिया र म्यानमारले थाइल्याण्डमा आयोजना हुने एएफसी यु–१९ महिला च्याम्पियनसिपमा स्थान पक्का गरेको छ ।