मुम्बई– बलिउडमा महिला केन्द्रीत फिल्म बन्ने संख्या निकै छ । त्यही बलिउडमा महिला माथि हिंसा हुने खबर पनि आइरहन्छ । बलिउडमा कैयौं अभिनेत्रीहरु आफ्नो पति वा प्रेमीबाट पीडित बनेका छन् ।

अमर उजालामा प्रकाशित समाचारअनुसार अभिनेत्री श्वेता तिवारीले वैवाहिक जीवनमा घरेलु हिंसाको शिकार भइसकेकी छन् । हालैमात्र उनले आफ्नो सन्तानमा असफल विवाहले पारेको प्रभावका विषयमा खुलेर कुरा गरेकी छन् ।

श्वेताले सन् २००७ मा पहिलो पति राजा चौधरीसँग सम्बन्धविच्छेद गरेकी थिइन् । त्यसपछि उनले अभिनाव कोहलीसँग दोस्रो विवाह गरिन् । दुई वर्ष अघि अभिनेत्रीले अभिनवका विरुद्ध आफूमाथि हात उठाएको आरोप लगाइन् । उनले पहिलो पति राजाका विरुद्ध पनि घरेलु् हिंसाको आरोप लगाएकी थिइन् ।

बलिउड अभिनेत्री कंगना रनावत करियरको सुरुवाती समयदेखि अभिनेता आदित्य पञ्चोलीका साथ लिभ इन रिलेसनमा थिइन् । उनले एक टेलिभिजन अन्तरवार्तामा आदित्यसँगको आफ्नो सम्बन्धका बारे खुलाएकी थिइन् ।

‘म मुम्बईमा नयाँ थिए । अठार वर्षको पनि थिइन् । एक होस्टलमा बस्थें । तब आदित्यले मलाई एक फ्ल्याट दिएका थिए । तर उनले त्यहाँ मलाई घरेलु बन्दी बनाएका थिए । मैले यो विषयमा उनकी पत्नीसँग कुरा गरें, तर उनले मेरो मद्दत गर्न अस्वीकार गरिन् । म निकै अप्ठ्यारो अवस्थामा कुदेर घर बाहिर निस्कएँ । त्यसपछि मलाई अनुराग बासु र उनकी श्रीमतिले सहयोग गरिन् । अनुरागले मलाई १५ दिनसम्म उनको अफिसमा लुकाएर राखे’, उनले भनेकी छन् ।

पूर्व मोडल र सन् १९९९ की ‘मिस वल्र्ड’ अभिनेत्री युक्ता मुखीले व्यापारी प्रिन्स तुलीसँग सन् २००८ मा विवाह गरिन् । सन् २०१३ मा प्रिन्सविरुद्ध दाइजो उत्पीडनका मामलामा मुद्धा दर्ता गराइन् ।

प्रिन्सले युक्तामाथि शारीरिक र मानसिक शोषण गरेका थिए । दुवैको सन् २०१४ मा सम्बन्धविच्छेद भयो ।

‘बिग बोस १३’को प्रतिष्पर्धी र ‘नच बलिए ४’की विजेता दलजीत कौरले पति शालीन भानोटविरुद्ध प्रताडिन गरेको र कुटपिट गरेको मामलामा मुद्धा दर्ता गराएकी थिइन् ।

विवाहको ६ वर्षपछि दलजीतले दाइजोको माग गरेको विषयमा मुद्धा दर्ता गराइन् । अहिले दिलजीत पति शालीनसँग अलग्गिएर छोरा जोर्डनका साथ एक्लै जीवन बिताइरहेकी छन् ।