काठमाडौँ– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाली कांग्रेस सभापति शेरबहादुर देउवालाई सत्तासमीकरणबारे स्पष्ट निर्णय दिन आग्रह गरेका छन् ।

माओवादी केन्द्रका नेतासहित देउवालाई भेट्न मंगलबार बुढानीलकण्ठ पुगेका प्रचण्डले नयाँ सरकार गठनका विषयमा ठोस निर्णय दिन आग्रह गरेका हुन् ।

भेटमा सभापति देउवाले जसपासँग छलफल गरेर आफू चाँडै ठोस निष्कर्षमा पुग्ने आश्वसन दिएको जनाइएको छ ।

एमाले र माओवादी केन्द्रबीचको एकता बदर गर्ने सर्वोच्च अदालतको निर्णयमा पुनरावलोकन निवेदन दर्ता गराए लगत्तै  निवासमै पुगेर प्रचण्डले देउवासँग भेट गरेका हुन ्थि ।

नेकपा विभाजित भएको बेलादेखि नै प्रचण्डले देउवालाई प्रधानमन्त्रीमा प्रस्ताव गर्दै आएका थिए । तर, देउवा भने नेकपाको आधिकारिक विभाजन नभएकाले एउटा पक्षसँग मिलेर सरकार बनाउन सहमत भएका थिएनन् ।

सत्तासमीकरणबारे कांग्रेस र जसपाले ठोस निर्णय लिएको छैन भने माओवादी केन्द्रले पनि सरकारको समर्थन फिर्ता नलिँदा नयाँ सरकार गठनबारे अन्योलता कायमै छ ।

गत पुस ५ मा प्रधानमन्त्री केपी शर्मा ओलीले गरेको संसद् विघटन सर्वोच्च अदालतले फागुन ११ को फैसालमार्फत असंवैधानिक भन्दै उल्टाइदिएपछि ओलीको विकल्पमा नयाँ सरकार गठनको पहल सुरु भएको थियो ।