जनकपुरधाम– महोत्तरीको पिपरा गाउँपालिका–५ का ६५ वर्षीय मुसाफिर झा र उनकी ६० वर्षीया श्रीमती गीतादेवीको अपहरण गरी हत्या गरेको आशंकामा थप तीन जना पक्राउ परेका छन् ।

प्रदेश २ प्रहरी प्रमुख डिआईजी धिरजप्रताप सिंहका अनुसार पक्राउ पर्नेहरूमा स्थानीय विकास झा, कैलास झा र शम्भु झा छन् । कैलास र विकास दाजुभाइ हुन् । उनीहरु तीनैजना झा दम्पतीको नातेदार रहेको बुझिएको छ । अनुसन्धानका क्रममा संलग्नता देखिएकाले उनीहरु तीनैजनालाई शुक्रबार नियन्त्रणमा लिएको सिंहले जानकारी दिए । सिंहका अनुसार उनीहरुको घरमा झा दम्पतीको जलेको कपडा फेला परेको थियो ।

फागुन १० गते राति अपहरणमा परेका झा दम्पतीको दुईदिनअघि मात्र कंकाल फेला परेको थियो । कंकालको शुक्रबार पोष्टमार्टम पश्चात् दाहसंस्कार गरिएको छ ।

घटनामा संलग्न रहेको भन्दै प्रहरीले पक्राउ गरी यसअघि छिमेकी रामबाबु यादव, उनका छोराद्वय सुरेन्द्र यादव, राजेन्द्र यादव र भारत बिहार मधुबनी घर भइ बनौलीमा बस्दै आाएका हरेन्द्र ठाकुरलाई सार्वजनिक गरिसकेको छ ।

पक्राउ परेका ठाकुरले झा दम्पतीको जग्गा नजिकै प्लटिङ गरेका थिए । प्लटिङ गरिएको जग्गाबाट सडकमा निस्कने बाटो थिएन । त्यसैले ठाकुरलगायतका व्यक्ति पटक–पटक झा दम्पतीलाई बाटोका लागि जग्गा बिक्री गर्न दबाब दिएको र बिक्री नगरेकै कारण अपहरण गरी हत्या गरेको हुनसक्ने प्रहरीको अनुमान छ ।