काठमाडौं– आतंकवादी संगठन इस्लामिक स्टेटका प्रमुख अबु बकर अल बगदादीको नयाँ भिडियो सार्वजनिक भएको छ । इस्लामिक स्टेट आबद्ध अल फुरकान मिडिया सेन्टरले बगदादी समावेश रहेको १८ मिनेट लामो नयाँ भिडियो सार्वजनिक गरेको हो ।

उनीसहित अन्य तीन लडाकु समेत देखिएको भिडियोमा बगदादीले पूर्वी सिरियाको डिएर एजजोर प्रान्तमा रहेको बाघुज शहरमा भएको भीडन्तबारे पनि चर्चा गरेका छन् । भिडियोमा उनले बाघुज शहरमा भएको भीडन्तको बदला लिनसमेत आफ्ना समर्थकलाई आह्वान गरेका छन् ।

त्यस्तै उनले हालै श्रीलंकामा भएको आक्रमणको चर्चा गरेको देखिन्छ । भिडियोमा उनको साथमा एके ४७ जस्तै देखिने राइफल रहेको छ भने उनले कालो कपडा लगाएका छन् । उनीबाहेक भिडियोमा देखिने अन्य तीन लडाकुको भने अनुहार ब्लर गरिएको छ ।

यद्यपि भिडियो कहिले र कहाँ खिचिएको हो भन्ने स्पष्ट नभए पनि बगदादीले अघिल्लो साता श्रीलंकामा गराइएको आक्रमणबारे पनि चर्चा गरेको हुँदा भिडियो केही दिन अघिमात्र खिचिएको हुनसक्ने अनुमान लगाउन सकिन्छ ।

सन् २०१४ मा इराकको मोसुल शहरमा रहेको अल नूरी मस्जिदबाट इस्लामिक राज्य स्थापनाको औपचारिक घोषणा गरे यता उनी देखिएका थिएनन् ।

यसबीचमा उनी मारिएको तथा गम्भीर घाइते भएको समाचार आएका थिए । तर, भिडियोमा उनी स्वस्थ्य नै रहेजस्तो देखिन्छन् ।

कुनै समय सिरिया र इराकको विशाल भूभागमा कब्जा जमाएको इस्लामिक स्टेटले अहिले भने सो क्षेत्रका कुनै पनि भूभाग नियन्त्रण नगरेकाले इस्लामिक स्टेटका नेताहरु सिरिया र इराकको विशाल मरुभूमिमा लुकेर बसेको हुनसक्ने बताइन्छ ।

इस्लामिक स्टेटले घोषाणा गरेको इस्लामिक राज्य अर्थात् खिलाफातका शासक अर्थात् खिलाफ रहेका उनीबारे जानकारी दिनेलाई अमेरिकाको न्याय मन्त्रालयले ‘रिवार्ड फर जस्टिस’ कार्यक्रमअन्तर्गत २ करोड ५० लाख अमेरिकी डलर बराबरको इनाम राखेको छ ।