काठमाडौं– यही चैत २७ गतेबाट रिलिजको तयारीमा रहेको फिल्म ‘लप्पन छप्पन २’ कोभिडको त्रासले पछाडि सरेको छ ।

भारतमा कोभिड महामारीको क्रम पुनः बढेपछि स्वास्थ्य मन्त्रालयले कोभिड– १९को जोखिम कायमै रहेकाले भीडभाडजन्य बैठक, जुलुस, कार्यक्रम र व्यापार नगर्न भनेपछि फिल्मको रिलिज तत्कालका लागि रोकिएको हो ।

निर्देशक तथा निर्माता मुकुन्द भट्टले पूर्व निर्धारित मितिमा फिल्म रिलिज नहुने स्वीकारे । ‘कोभिडको पछिल्लो अवस्था र स्वास्थ्य मन्त्रालयको आग्रहलाई सहज स्वीकार गर्दै हालका लागि फिल्म रिलिज कार्यक्रम स्थगित गरिएको छ’, उनले भनेका छन् ।

एक्सन फ्लेभरको फिल्ममा शिव श्रेष्ठ, सौगात मल्ल, अर्पण थापा, अनुपविक्रम शाही, प्रकाश कुँवर, स्व.दीपक क्षेत्री, सरिता गिरी, एञ्जल श्रेष्ठ, अनिल खनाल, राजेन्द्र विष्टलगायतका कलाकारको अभिनय छ ।

खिलेन्द्रराज तिमसिनाको प्रस्तुति ‘लप्पन छप्पन २’बाट शक्ति श्रेष्ठ, केरोलिन कोलिन्डा, सुपर गुरुङ, आना ढकाल, सृजना सिना, रन्जीत वन्तलगायतले अभिनयमा डेब्यु गर्दैछन् ।

फिल्म नेपालीसँगै हिन्दी, तमिल, तेलुगु, भोजपुरी र चिनियाँ गरी ६ भाषामा रिलिज हुनेछ ।