भक्तपुर– भक्तपुरको सिर्जनानगरमा सिलिन्डर पड्केर आगो लाग्दा ६ जना घाइते भएका छन् ।

सूर्यविनायक नगरपालिका–५ सिर्जनानगरस्थित एक घरमा ग्यास सिलिन्डर पड्केर आगलागी भएको हो । आइतबार साँझ शिवलाल कस्पालको चारतले घरको पहिलो तलामा सञ्चालित होटलमा ग्यास सिलिन्डर पड्किएको प्रहरीले जनाएको छ ।

सिलिन्डर पड्किएर आगलागी हुँदा होटल सञ्चालक दोलखाको शैलुङ गाउँपालिका–६ घर भई सूर्यविनायक–४ दधिकोट बस्ने टीकाराम बस्नेत, उनका आफन्त शैलुङ–१ घरभई कोटेश्वर बस्ने राजेन्द्र कार्की र ३९ वर्षीया गीता कार्की घाइते भएका छन् ।

त्यस्तै सेवाग्राहीहरू भक्तपुर, सल्लाघारी बस्ने १९ वर्षीय आदित्य सुवेदी, सूर्यविनायक नगरपालिका–५ कटुन्जेका १७ वर्षीय विकास पौडेल र १६ वर्षीय हिमुन्स थापा पनि घाइते भएको प्रहरीले जनाएको छ ।

घाइते सबैको कीर्तिपुरस्थित बर्न सेन्टर अस्पतालमा उपचार भइरहेको भक्तपुर प्रहरीले जनाएको छ ।