मुम्बई– मार्च १९ अर्थात् भोलि शुक्रबारबाट रिलिज हुने फिल्म ‘सन्दीप और पिंकी फरार’ को केही अंश नेपालमा पनि छायांकन गरिएको छ ।

दिवाकर बनर्जी निर्देशित फिल्ममा अर्जुन कपूर र परिणीति चोपडा प्रमुख भूमिकामा छन् । फिल्ममा परिणीतिले सन्दीप कौर र अर्जुनले पिंकी दहियाको भूमिकामा अभिनय गरेका छन् ।

दैनिक भास्करसँगको अन्तरवार्तामा अर्जुनले नेपाल र भारतको सीमानाका विषयमा भएको छायांकन अनुभवबारे बोलेका छन् । ‘फिल्मको सुटिङ गुडगाँव र नयाँदिल्लीमा भएको छ । हामी उत्तराखण्डको पिथौरागढ पनि गयौं । जो स्थान नेपालको सीमानामा पर्छ’, अर्जुनले भनेका छन् ।

उनले त्यहाँबाट १ सय ५० पाइला जति हिँड्दा नेपाल पुगिने बताए । ‘पहिला सीमाना पार गर्नु ठूलो कुरा लाग्थ्यो । तर नेपाल र भारतको सीमामा अनौठो अनुभव भयो’, पहिलोपटक पिथौरागढ आएका अर्जुनले भनेका छन् ।

यो फिल्मको केही समय अघि ट्रेलर सार्वजनिक भएको छ । ट्रेलरको सुरुवात परिणीतिबाट हुन्छ, जो एक ट्याक्सी ड्राइभर देखिने अर्जुनसँग सहयोग माग्छिन् ।

परिणीतिलाई प्रहरीले खोजिरहेका हुन्छन् । त्यहीकारण अर्जुनले उनलाई त्यहाँबाट भगाउन सहयोग गर्छन् । उनीहरु भागेर एक वृद्ध दम्पत्तिको घर पुग्छन् ।

तर प्रहरीहरु उनीहरु भएकै ठाउँमा खोज्दै आइपुग्छन् । त्यसपछि उनीहरु प्रहरीबाट बच्न नेपाल आउछन् ।