काठमाडौँ– नेकपा एमालेको असन्तुष्ट पक्षले चैत ४ र ५ गते बोलाएको भेला स्थगित गर्न संस्थापन पक्षले आग्रह गरेको छ ।

पार्टी कार्यालय धुम्बाराहीमा सोमबार भएको बैठकमा भेला स्थगित गर्न आग्रह गरिएको पार्टी सचिव प्रदीप ज्ञवालीले जानकारी दिए ।

‘यस्तो भेलाले पार्टी एकतालाई बल पुर्‍याउँदैन भन्ने हाम्रो धारणा हो, यही कुरा उहाँहरूसमक्ष राख्यौं,’ ज्ञवालीले भने । नेपाल पक्षले भने संस्थापन पक्षद्वारा गत २८ फागुनमा आयोजना गरेको विशेष बैठकका निर्णयहरू रद्द गर्नुपर्ने शर्त राखेको छ ।

पार्टी उपाध्यक्ष भीम रावलले भने, ‘यदि २८ गतेको निर्णय उहाँहरूले फिर्ता लिने हो भने हामी भेला स्थगित गर्न सक्छौं ।’

एकलौटी रुपमा गरिएको निर्णय आफूहरूलाई स्वीकार्य नभएको भन्दै उनले निर्णय फिर्ता लिइनु पर्ने बताए ।