काठमाडौँ- पाहुना टोली इंग्ल्यान्डले भारतविरूद्धको ५ खेलको टी-ट्वान्टी सिरिजमा १-० को अग्रता बनाएको छ ।

घरेलु टिम भारतविरुद्धको पहिलो टी-ट्वान्टी क्रिकेटमा ८ विकेटकले जित निकाल्दै इंग्ल्यान्डले सिरिजमा १-० को अग्रता बनाएको हो ।

अहमदाबादमा शुक्रबार राति भएको खेलमा भारतले दिएको १ सय २५ रनको लक्ष्य इंग्ल्यान्डले १५ ओभर ३ बलमा मात्र २ विकेट गुमाएर पूरा गर्‍यो ।

इंग्ल्यान्डको जितमा जासन रोयले ४९ रन जोड्दा जोस बटलरले २० रन बनाए । जोनी बेयर्स्टोले अविजित २६ रन बनाए । डाविड मालन २४ रनमा अविजित रहे ।

भारतका युजभेन्द्र चाहल र वासिङ्गटन सुन्दरले १/१ विकेट लिए ।

पहिले ब्याटिङ गरेको भारतले २० ओभरमा ७ विकेट गुमाएर १ सय २४ रन बनाएको थियो । भारतका श्रेयस एयरले ६७ रनको अर्धशतकीय इनिङ्स खेले । यस्तै ऋषव पन्तले २१ रन जोड्दा हार्दिक पाण्डयले १९ रन बनाए ।

इंग्ल्यान्डका जोफ्रा आर्चरले ३ विकेट लिए ।