जनकपुर– प्रदेश २ का प्रमुख डा राजेश झाले जनकपुरको एक विद्यालयको निरीक्षण गर्ने क्रममा कक्षा १ का विद्यार्थीलाई पढाएका छन् ।

जनकपुरधाम उपमहानगरपालिकाको वडा नं. ९ स्थित श्री सरस्वती उच्च माविको कक्षा १ का बालबालिकालाई प्रदेश प्रमुख झाले पढाएका हुन् ।

शुक्रवार दिउँसो करिब १ बजे अचानक विद्यालय पुगेका प्रदेश प्रमुख झाले आफूले कक्षा १ का बच्चाहरुको कक्षामा केही समय बिताउन चाहेको इच्छा व्यक्त गरेका थिए ।

मुलुककै पुरानो विद्यालयको रुपमा चिनिने जनकपुरधामको ऐतिहासिक सरस्वती माविमा पुगेर कक्षा १ का बच्चाहरुलाई उनले आधा घण्टा पढाएका थिए ।

देश निर्माणमा अहम भूमिका खेलेका विभिन्न क्षेत्रका हस्तीहरु सो विद्यालयको कक्षा १ बाटै शिक्षादीक्षा आर्जनको थालनी गरेकाले सोही कक्षामा केहि समय बिताउन चाहेको उनले बताए ।

‘यो विद्यालय त्यही हो, जहाँ नेपालका प्रथम राष्ट्रपति डा. रामवरण यादव, वर्तमान उपप्रधानमन्त्री ईश्वर पोखरेल, कांग्रेस उपसभापति विमलेन्द्र निधी, पूर्व गर्भनर सत्य प्यारा श्रेष्ठ र केयुका उपकुलपति सुरेशराज शर्मा जस्ता दर्जनौं हस्तीहरु उत्पादन भएका छन् । तर, यस्ता व्यक्ति उत्पादन गर्ने विद्यालय आज जर्जर अवस्थामा पुगेको छ ।’ उनले भने ।

२००४ सालमा स्थापना भएको विद्यालयमा हाल ८ सय ५० जना विद्यार्थी विद्यालयको कक्षा १२ सम्म अध्ययनरत छन् । २०७२ सालको महाभूकम्पपछि विद्यालयको मुख्य भवन प्रयोग विहिन भएपनि पुनर्निर्माणमा कसैको ध्यान जान सकेको छैन । तीन विघा १९ कठ्ठा क्षेत्रफलमा रहेको विद्यालयमा २०७०\०७१ तथा ०७३/०७४ मा नयाँ भवन बनाइए पनि पुरानो ऐतिहासिक भवन विनाश हुने अवस्थामा पुगेको छ ।

विद्यालयका प्रधानाध्यापक सत्यनारायण मण्डलले विद्यालयमा प्रदेश प्रमुखको आगमनले शिक्षकहरूमा देखिएका कमी कमजोरीसमेत उजागर भएको र यसले त्यसलाई सुधार्ने प्रेरणा मिलेको प्रतिक्रिया दिए ।