काठमाडौँ– ईसेवा आइडीमा अनधिकृत रुपमा पहुँच पुर्‍याई ठगी गरेको अभियोगमा एक युवक पक्राउ परेका छन् ।

काठमाडौं महानगरपालिका-७ चाबहिल बस्ने दाङ तुलसीपुर उपमहानगरपालिका-४ घर भएका २३ वर्षीय आशिष खड्कालाई भक्तपुर सानोठिमीबाट गत शुक्रबार प्रहरीले पक्राउ गरेको हो ।

पीडितहरुको बारेमा पूर्ण जानकारी लिई बिभिन्न बहानामा उनीहरुका कम्प्यूटर, ल्यापटप, मोबाइल जस्ता डिभाइसबाट गुगल एकाउण्टको पासवर्ड चोरी गरी ईसेवा आइडीमा अनधिकृत रुपमा पहुँच पुर्‍याई अन्य व्यक्तिको नामको खातालगायत ईसेवा समेतमा रकम रकमान्तर गरी अनलाइन ठगी गरेको सूचनाका आधारमा खड्कालाई पक्राउ गरिएको प्रहरीले जनाएको छ ।

महानगरीय अपराध महाशाखा मिनभवनबाट खटिएको प्रहरीले खड्कालाई पक्राउ गरेको हो ।

खड्कालाई ठगी मुद्धामा आवश्यक कारवाहीका लागि महानगरीय प्रहरी परिसर काठमाडौं पठाइएको महाशाखाले जनाएको छ ।