काठमाडौं–  संसद पुनर्स्थापनाको माग गरेर आफै संसद बहिष्कार गरेकोप्रति साविक नेकपाको ओली समूहका नेता गोकुल बाँस्कोटाले  प्रचण्ड–नेपाल समूहमाथि कटाक्ष गरेका छन् ।

उनले प्रचण्ड–नेपाल समूहलाई नयाँ चटक गर्न भन्दै व्यङ्ग्य समेत गरेका छन् । ‘आफैँ पुनर्स्थापनाको माग गरे अनि बहिष्कार, त्यो पनि सदन चल्न हुँदैन भनेर, सूर्य पूर्वबाटै उदायो त किन हत्तु हैरान बनाउँदै दौड्या हुन्?’ बाँस्कोटाले सामाजिक सञ्जाल फेसबुकमा लेखेका छन् ।

सर्वोच्च अदालतले संसद पुनर्स्थापना गरेपछि बसेको पहिलो बैठक प्रचण्ड–नेपाल समूहले बहिष्कार गरेका थिए । सोही विषयमा बाँस्कोटाले प्रचण्ड–नेपाल समूहका नेतालाई व्यङ्ग्य गरेका हुन् । उनले सर्वोच्चको फैसलापछि अग्रगमन भयो भन्दै लड्डु बाँडेकाहरू कता गए भन्दै प्रश्न समेत गरेका छन् ।

‘अस्ति त अग्रगमन भो भनेर लड्डु बाँड्या थे। अब ए–कता वा एकता जे चाहियो, सो पाइया छ। फेरि क्याउँक्याउँ? सकिएन बा! हे, कम्फरटेबल लौन, केही नयाँ चटक गर,’ बाँस्कोटाले भनेका छन् ।