काठमाडौँ- नेपाल कम्युनिष्ट पार्टी (नेकपा)को आधिकारिकता विवादबारे निर्वाचन आयोगका पदाधिकारीहरू आज छलफलमा जुट्दैछन् ।

पार्टीको आधिकारिकता विवादमा प्रचण्ड–माधव समूहको पटकपटक दबाबपछि आयोगले छिटो विवाद निरूपणको गृह कार्य थालेको हो ।

आज आयुक्तहरुको बैठकमा नेकपाको प्रचण्ड-माधव समूहले आधिकारिकता दाबी गर्दै पेस गरेको कागजातको अध्ययन गर्न लागेको प्रमुख निर्वाचन आयुक्त दिनेशकुमार थपलियाले जानकारी दिए ।

आयुक्तहरू छलफलमा जुटे पनि आजै विवादको निरूपण भने नहुने उनले बताए ।  विवाद समाधानका लागि अझै केही दिन लाग्न सक्ने उनको भनाइ छ ।

बहुमत केन्द्रीय सदस्यको हस्ताक्षर बुझाएको प्रचण्ड–माधव समूहले आफूहरू नै आधिकारिक भएको दाबी गर्दै आएको छ । नेकपाको विवाद नसुल्झिदा संसदमा नयाँ सरकार गठनमा समेत अप्ठ्यारो पर्ने जानकारहरू बताउँछन् ।