काठमाडौं– पल शाह र मलिका महतले शीर्ष भूमिका निभाउने गरी फिल्म निर्माणको तयारी थालिएको छ ।

पछिल्लो समय दर्शकले रुचाएको यो रिल जोडीलाई शीर्ष भूमिकामा लिएर केन्द्र मोसन पिक्चर्सले फिल्म बनाउने तयारी थालेको हो ।

केन्द्र मोसन पिक्चर्सले यसअघि पल र मलिकाको जोडीलाई दुईवटा म्युजिक भिडियोमार्फत सार्वजनिक गरिसकेको छ ।

फिल्म निर्माणबारे यसअघि नै चर्चा चले पनि यसबारेमा कुनै आधिकारिक जानकारी दिइएको छैन । नायिका मलिका महतले फिल्ममा काम गर्नेबारे कुरा भइरहेको तर अझै फाइनल नभएको बताइन् ।

‘लिखित सम्झौता भएको छैन तर कुरा चलिरहेको छ,’ मलिकाले भनिन् ।

पछिल्लो समय पल र मलिकालाई फिचरिङ गरिएका दुई म्युजिक भिडियोले चर्चा कमाएका छन् । ‘फूलबुट्टे सारी’ र ‘टाढा भए पनि’ ले दर्शकको अपार माया पाएका छन् । यी दुई फिल्म दुई हप्तामै युट्युबमा एक करोड दर्शकले हेरेर रेकर्ड ब्रेक गरेका छन् ।

कुनै नेपाली गीत संगीत करोड क्लबमा पुगे पनि त्यसका लागि समय लाग्ने गर्छ । पल र मलिकाको जोडीलाई दर्शकले मन पराएका छन् ।
दर्शकको यही क्रेज देखेर केन्द्र मोसन पिक्चर्सले नै फिल्मको तयारी थालेको हो ।