काठमाडौँ– प्रमुख प्रतिपक्षी दल नेपाली कांग्रेसले प्रदेश १ को प्रदेशसभा बैठक सारिएको प्रति आपत्ति जनाएको छ ।

२० फागुन बिहीबारका लागि बोलाइएको प्रदेशसभा बैठक प्रदेशसभा सचिवालयले बुधबार सूचना टाँस गरी २ चैतसम्मका लागि स्थगित गरेको थियो ।

बिहीबार कांग्रेसका प्रमुख सचेतक केदार कार्कीले पत्रकार सम्मेलन गरी परामर्शबिनै प्रदेशसभा बैठक स्थगित गरिएको भन्दै आपत्ति जनाएका हुन् । प्रमुख सतेचक कार्कीले सरकार प्रदेशसभाप्रति अनुदार हुँदै गएको र सत्ताका लागि संसदलाई नै बन्धक बनाउने प्रयत्न गरेको आरोप लगाए ।

‘सरोकारवाला पक्षसँग सहमतिको प्रयत्न नगरेरै फेरि पनि सूचनामार्फत लामो समय प्रदेशसभाको बैठक सार्ने कुरा दुःखद छ,’ उनले भने, ‘सत्ताको आयु बढाउन यसरी व्यवस्थापिकालाई बन्धक बनाउने कामप्रति हाम्रो आपत्ति छ ।’

सरकार कानुन बनाउनेतर्फ ध्यान नदिएर प्रदेशसभालाई बन्धक बनाएर भ्रष्टाचारमा लिप्त बनेको कार्कीले आरोप लगाए । प्रदेशसभाका सभामुखको क्रियाकलापलाई पनि आफूहरूले नजिकबाट नियालिरहेको भन्दै कार्कीले सदनको प्रक्रियाबाटै जारी गतिरोध अन्त्य गर्नुपर्ने बताए ।

मुख्यमन्त्रीविरुद्धको अविश्वासको प्रस्तावका सन्दर्भमा प्रमुख सचेतक कार्कीले प्रदेशसभामा दर्ता भएको अविश्वासको प्रस्ताव कांग्रेसको सम्पत्ति भइसकेको टिप्पणी गरे ।