मुम्बईं– बलिउड अभिनेता सोनू सूदले कोरोना भाइरसको महामारीका समयमा समाजसेवाको जुन मिसन सुरु गरे, त्यो अलग–अलग रुपले अहिले पनि जारी छ । अब सोनूले देशको सबैभन्दा ठूलो ब्लड बैंक बनाउने योजना बनाएका छन् ।

सोनुले हालैमात्र एक भिडियो सामाजिक सञ्जालमा राख्दै यो कुराको खुलासा गरेका हुन् । उनले रगतको आवश्यकता परेका व्यक्तिलाई जोड्नका लागि बैंक सुरुवात गर्न लागेको बताएका छन् ।

दैनिक जागरणका अनुसार भारतमा हरेक घण्टा १२ हजार मानिसहरु रगतको अभावमा मृत्युवरण गरिरहेकाले त्यो बीस मिनेटमा जोकोहीलाई पनि बचाउन सकिने भन्दै सोनुले ब्लड बैंक शुरुवात गर्न लागेका हुन् । ‘आउनुहोस्, ज्यान बचाऊँ । तपाईंको आफ्नो ब्लड बैंक चाँडै आउँदैछ’, उनले लेखेका छन् ।

सोनूले यो अभियानका लागि ‘सोनू फर यू’ नामको एक एप सार्वजनिक गर्दैछन्, जो रक्तदातालाई अत्यावश्यक रगत चाहनेसँग जोड्ने काम गर्छ । यो बैंकका माध्यमबाट दुर्लभ रक्त समूहको रगत उपलब्धतामा सुनिश्चित हुने सोनूको दाबी छ ।

सोनूले यो एपको योजना उनको साथी जोनसनको साथ मिलेर बनाएका हुन् ।