काठमाडौँ– अमेरिकी राष्ट्रपति जो बाइडेनले आगामी मे महिनाको अन्त्यसम्ममा अमेरिकाका सबै वयस्क नागरिकलाई कोरोनाविरुद्धको खोप लगाइसक्ने बताएका छन् ।

कारोना खोप अभियानलाई तीव्र गतिमा अगाडि बढाउन आवश्यक रहेको बताउँदै बाइडेनले खोप लगाउन मानिसहरूलाई आकर्षित गर्नुपर्ने बताए ।

कोरोना भाइरसको नयाँ प्रजाति देखिनु थप चुनौती भएको उल्लेख गर्दै उनले यो लडाईं चाँडै समाप्त नहुने बताए ।

राष्ट्रपति बाइडेनले औषधि उत्पादक कम्पनी मेर्कले अब जोन्सन एण्ड जोन्सनको सिंगल डोज भएको कोरोना खोप बनाउन सहयोग गर्ने पनि जानकारी दिए । यसअघि मेर्कले पनि कोरोना खोप बनाउने प्रयास गरेको थियो । तर, पछि उक्त कार्यलाई मेर्कले छाडिदिएको थियो ।

अमेरिकाका केही राज्यहरूले अर्थव्यवस्थालाई पुनः पुरानै गतिमा ल्याउन कोरोना महामारीका कारण लगाइएको प्रतिबन्ध फुकुवा गर्दै गएका छन् ।

अमेरिकामा कोरोना संक्रमणको दर पछिल्लो समय कम हुँदै गएको देखिएको छ । अहिले सरदर दैनिक ६८ हजार संक्रमित फेला परिरहेका छन् । गत जनवरी महिनामा दैनिक साढे दुईदेखि तीन लाख जनामा कोरोना संक्रमण पुष्टि हुने गरेको थियो ।

अहिलेसम्म अमेरिकामा साढे सात करोड मानिसले कोरोना खोप पाइसकेका छन् । दैनिक १७ लाख बढी मानिसले खोप लगाइरहेका छन् ।