मुम्बई– बलिउड अभिनेत्री रिया चक्रवर्ती पुराना कुरालाई बिर्सिएर दह्रो मन लिएर आफ्नो जिन्दगीलाई अगाडि बढाइरहेकी छन् । उनको यो काममा बलिउडका ठूला स्टारहरुले समर्थन गरिरहेका छन् ।

सन् २०२० मा अभिनेता सुशान्त सिंह राजपूतको निधनपछि रिया र उनको परिवार जुन पीडादायक अवस्थाबाट गुज्रियो, त्यसलाई बिर्सिएर अगाडि बढ्न उनीहरुलाई सजिलो थिएन । तर चक्रवर्ती परिवार अहिले भने त्यो पीडालाई बिर्सदै विस्तारै अघि बढिरहेका छन् ।

आफ्नो करियरलाई पुनः पहिलाकै बाटोमा लैजानका लागि रिया निकै उत्साहित छिन् । यद्यपि उनको कमब्याक फिल्म ‘चेहरे’को पोस्टरमा उनको अनुहार नदेखिदा भने रिया निराश बनेकी छन् ।

यतिबेला बलिउडका कैयौं फिल्म निर्माताहर रियासँग सहकार्य गर्न इच्छुक छन् । बलिउड हंगामा प्रकाशित समाचारअनुसार रियाको सुन्दरता र प्रतिभाले फिल्म निर्मातालाई आकर्षित गरिरहेको छ ।

‘उनी जमानतमा छिन्, तर पनि उनीसँग सहकार्य गर्न मलाई कुनै समस्या छैन । यदि सञ्जय दत्त आफ्नो जमानतका समयमा पनि व्यस्त हुन्छन् भने यी युवती आफ्नो काम किन गर्न सक्दिनन् ? रिया र उनको परिवारले विगतका दिनमा के मात्र सहेनन् । एक वर्षअघिको तुलनामा सबै पीडाले उनलाई एउटा राम्रो अभिनेत्री बनाएको छ’, एक निर्माताले भनेका छन् ।

फिल्म निर्माता रुमी जाफरीले आफ्नो फिल्म ‘चेहरे’मा रियालाई अभिनय गराएका छन् । यिनै रुमी रियालाई लिएर अर्को नयाँ फिल्म बनाउने योजनामा छन् ।

‘म जहिल्यै पनि यो कुरामा अडिग छु कि रिया निर्दोष पीडित हुन् । उनी र उनको परिवार यो पीडाको हकदार थिएनन्, जुन उनीहरुले झेले । रियाको पिताले कैयौं वर्षसम्म देशको सेवा गरे । मैले रियासँग फिल्म ‘चेहरे’मा काम गरें, जुन फिल्म सुशान्तको मृत्यु अघि नै बनेको थियो । म लकडाउनपछि निर्माता वाशु भगनानीद्वारा निर्मित फिल्मका लागि सुशान्त र रियालाई लिएर एक प्रेमकथाको फिल्मको सुटिङको लागि लण्डन जाने तयारीमा थिए । तर भगवानले यसो गर्न दिएनन्’ रुमीले भनेका छन् ।