काठमाडौँ– सहिद स्मारक ‘बी’ डिभिजन लिग फुटबलमा शीर्ष स्थानको सातदोबाटो युथ क्लबले साँघुरो जीत निकाल्दै अपराजित यात्रा कायमै राखेको छ ।

सोमबार भएको खेलमा सातदोबाटोले श्री भगवती क्लबलाई १-० गोल अन्तरले पराजित गरेको हो । सातदोबाटोस्थित एन्फा कम्प्लेक्समा भएको खेलमा सातदोबाटोलाई जीत दिलाउन दोर्जे तामाङले निर्णायक गोल गरे । खेलको २५ औं मिनेटमा दोर्जेले पेनाल्टीमा गोल गरेका हुन् ।

श्री भगवतीका खेलाडीले पेनाल्टी क्षेत्रमा ह्याण्ड गरेपछि सातदोबाटोले पेनाल्टी पाएको थियो । यो जीतसँगै सातदोबाटोले शीर्ष डिभिजनमा उक्लने मौकासमेत बलियो बनाएको छ ।

जीतपछि सातदोबाटोले ८ खेलमा २२ अंक जोडेको छ । श्री भगवती ८ खेलमा ६ अंक जोडेर नवौं स्थानमा रहेको छ ।

सोमबारै भएको अर्को खेलमा रानीपोखरी कर्नर टिम आरसिटीले टुसाल युथ क्लबलाई १-० गोल अन्तरले पराजित गरेको गर्‍यो ।

आरसिटीलाई जित दिलाउन अजित गुरुङले निर्णायक गोल गरे । पहिलो हाफ गोलरहित बराबरीमा सकिएको खेलको ७३ औं मिनेटमा अजितले निर्णायक गोल गरेका हुन् ।

जितसँगै आरसिटी लिगको पाँचौं स्थानमा उक्लिएको छ । आरसिटीले ८ खेलमा १२ अंक जोडेको छ ।

टुसाल ८ खेलमा ८ अंक जोडेर सातौं स्थानमा रहेको छ । लिगमा १२ क्लबले प्रतिस्पर्धा गरिरहेका छन् ।

एक टिम ‘ए’ डिभिजन लिगमा बढुवा हुनेछ भने एक टिम ‘सी’ डिभिजनमा घटुवा हुनेछ ।