झापा– प्रधानमन्त्री केपी शर्मा ओली मदन भण्डारी चुरे राजमार्गमा पर्ने ३१ वटा पुलको  संयुक्त शिलान्यासको घोषणा गरेका छन् । उनले झापाको दमकबाट ३१ पुलको शिलान्यास गरेका हुन् ।

विभिन्न योजनाहरुको शिलान्यासका लागि गृह क्षेत्र झापा क्षेत्र नं. ५ मा आएका ओलीले दमक २ मा पर्ने रतुवा खोलामा बन्ने पुलको शिलान्यास गरी राजमार्गको पूर्वी खण्डमा निर्माण हुने ३१ ओटा पुल संयुक्त शिलान्यास भएको घोषणा गरेका हुन् ।

सो स्थानमा ३१ ओटा ढुंगा राखी शिलान्यास गरिएको र प्रत्येक पुलमा ती ढुंगा लगेर निर्माण कार्य अघि बढाइने ओलीको सचिवालय सदस्य होमबहादुर थापाले जानकारी दिए ।

यस्तै प्रधानमन्त्री ओली मदन भण्डारी चुरे राजमार्ग निर्माण कार्यलाई द्रुत अघि बढाएको भन्दै राजमार्ग क्षेत्रमा पर्ने स्थानीय तहहरुको तर्फबाट संयुक्त रुपमा सम्मान समेत गरिएको थापाले बताए ।

आइतबार नै ओलीले कमल २ मा पर्ने कमल खोला, दमक १० मा पर्ने मावा खोला, सोही वडामा पर्ने रतुवा खोला र दमक १ र इलामको चुलाचुलीमा पर्ने रतुवा खोलामा निर्माण भएका पुलको उद्घाटन समेत गरेका थिए ।

आधा दर्जन कार्यक्रमहरुमा सहभागी भई ओली आइतबार साँझ नै काठमाडौ फर्किएको सचिवालय जनाएको छ ।