काठमाडौँ- नेपाल विद्युत प्राधिकरणले आज पनि ठाउँठाउँमा विद्युत कटौती गरेको छ ।

मर्मतसम्भारका लागि भन्दै प्राधिकरणले नियमितजसो विद्युत कटौती गर्दै आएको छ ।

आज (शनिबार) काठमाडौँ उपत्यकाका विभिन्न स्थानमा ६ घण्टासम्म विद्युत आपूर्ति बन्द हुँदैछ । कतै विद्युत कटौती भइसकेको छ भने कतै कटौती हुन लागेको छ ।

नेपाल विद्युत प्राधिरकणका अनुसार काठमाडौं उपत्यकाका केही स्थानमा नांगो तार हटाएर कभर कन्डक्टर राख्नेलगायतका काम हुने भएकाले विद्युत आपूर्ति बन्द हुँदैछ ।

प्राधिकरणले कीर्तिपुर फिडरअन्तर्गत त्रिभुवन विश्वविद्यालय परिसरमा ११ केभी क्षमताको लाइनको काम हुने जनाएको छ । जसले गर्दा कीर्तिपुर फिडरअन्तर्गतका क्षेत्रमा बिहान ११ बजेदेखि बेलुकी ५ बजेसम्म विद्युत आपूर्ति बन्द हुने भएको छ।

यस्तै, काठमाडौंको बल्खु, खसीबजार, सीता पेट्रोल पम्प, परीक्षा नियन्त्रण कार्यालय, कुमारी क्लब, भगवती मन्दिर र त्रिभुवन विश्वविद्यालय क्षेत्रमा विद्युत आपुर्ति बन्द हुने छ ।

यस्तै महाराजगञ्ज वितरण केन्द्र अन्तर्गतका शिवपुरी फिडर, बासबारी फिडर र सामाखुशी फिडर अन्तर्गतका क्षेत्रमा पनि आज दिउँसो विद्युत कटौती हुँदैछ ।

प्राधिकरणका अनुसार शिवपुरी फिडर अन्तर्गतका डाँडागाउँ, पासिकोट, भष्मस्थली, टोखा, पँचेटार, मेगासिटी, ढलमलटार लगायतका स्थानमा दिउँसो ३ बजेदेखि साढे ५ बजेसम्म वत्ती हुनेछैन ।

बासबारी फिडर अन्तर्गतका महाराजगञ्ज, कपनमार्ग, पिपलवोट, गंगालाल अस्पताल लगायतका क्षेत्रमा पनि दिउँसो ३ बजेदेखि साढे ५ बजेसम्म विद्युत कटौती हुने प्राधिकरणले जनाएको छ ।

सामाखुशी फिडर अन्तर्गतका बानियाँटार, इन्द्रेणी पुल, गोँगबु, सामाखुशी, भण्डारीटोललगायतका क्षेत्रमा बिहान साढे ११ बजेदेखि दिउँसो साढे ३ बजेसम्म विद्युत कटौती हुने प्राधिकरणले जनाएको छ ।

यस्तै पुल्चोक वितरण केन्द्र अन्तर्गत झम्सिखेल एरियामा पनि ११ केभी विद्युत लाइनको फ्यूज परिवर्तन गर्नु पर्ने भएकाले ९ बजेदेखि विद्युत कटौती भएको छ । फ्यूज परिवर्तनको काम सकिनेवित्तिकै पुल्चोक, कुवाटार, ठाडोढुंगा, हरिहर भवन लगायतका क्षेत्रमा साढे १० बजेसम्म विद्युत आउने प्राधिकरणले जनाएको छ ।