मुम्बई– अभिनेत्री आलिया भट्ट फिल्म ‘गंगूबाई काठियावाडी’को टिजर रिलिज पछि बलिउडमा चासोको विषय बनेकी छन् । फिल्ममा उनले एक लेडी माफियाको भूमिका निभाएकी छन् । फिल्ममा आलियाको लुक निकै दमदार देखिन्छ र तमाम टेलिभिजन स्टारले आलियाको कामको खुलेर तारिफ गरेका छन् ।

आलिया भन्दा अघि धेरै अभिनेत्रीहरुले पर्दामा भिलेन चरित्र निर्वाह गरिसकेका छन् । आजतकले ती अभिनेत्रीहरुको बारेमा एउटा समाचार तयार पारेको छ ।

अभिनेत्री सीमा विश्वासले सन् १९९६ मा रिलिज भएको फिल्म ‘बैंडिट क्विन’मा फूलन देवीको भूमिका निर्वाह गरेकी थिइन् । फिल्ममा उनको काम र भूमिकाले निकै चर्चा पाएको थियो । शेखर कपूर निर्देशित फिल्म सुपरहिट भएको थियो ।

अभिनेत्री शबाना आजमी सन् १९९९ मा रिलिज फिल्म ‘गडमदर’मा रंभीको भूमिकामा देखिएकी थिइन् । विनय शुक्ला निर्देशित फिल्ममा उनको भिलेन चरित्रलाई दर्शकले निकै रुचाएका थिए ।

अभिनेत्री इशा कोपिकरले सन् २०१० मा रिलिज फिल्म ‘शबरी’मा महिला ग्याङस्टारको भूमिका निर्वाह गरेकी थिइन् । फिल्ममा केही हत्यारासँग बदला लिन ग्याङस्टर बनेकी एक महिलाको कथा देखाइएको थियो ।

अभिनेत्री मधु शालिनीले राम गोपाल बर्माको फिल्म ‘डिपार्टमेन्ट’मा ग्रे शेडको भूमिका निर्वाह गरेकी थिइन् । फिल्मले बक्सअफिसमा र समीक्षकमाझ खासै राम्रो चर्चा पाउन सकेन ।

सन् १९८८ मा रिलिज फिल्म ‘शेरनी’मा दिवंगत अभिनेत्री श्रीदेवीले भिलेन चरित्र निर्वाह गरेकी थिइन् । शत्रुघ्न सिन्हा स्टारर फिल्ममा श्रीदेवीले एक डकैत बनेकी थिइन् ।

फिल्म ‘गुलाब ग्याङ’मा बलिउडकी ‘धक धक गर्ल’का रुपमा परिचित अभिनेत्री माधुरी दिक्षित भिलेन बनेकी थिइन् । उनको चरित्रलाई धेरैले मनपराएका थिए ।

सन् २०१७ मा रिलिज फिल्म ‘हसीना पार्कर’मा अभिनेत्री श्रद्धा कपुर भिलेन गेटअपमा देखिइन् । फिल्ममा उनले दाऊद इब्राहिमको बहिनी हसिना पार्करको भूमिका निभाएकी थिइन् । फिल्म आफ्नो कथाबस्तु र श्रद्धाको चरित्रका लागि चर्चामा रह्यो ।