दोहा– गैरआवासीय नेपाली संघ (एनआरएनए) साउदीले आइएलओले दिएको रकममा अनियमितता गरेको आरोपको खण्डन गर्दै आर्थिक प्रतिवेदन सार्वजनिक गरेको छ ।

विभिन्न सञ्चार माध्यममा एनआरएनए साउदीमा पनि आर्थिक हिनामिना भन्दै आएको समाचारहरु झुटा रहेको भन्दै भर्चुअल माध्यममार्फत पत्रकार सम्मेलन गरी आर्थिक प्रतिवेदन सार्वजनिक गरेको हो ।

संघले सार्वजनिक गरेको आर्थिक प्रतिवेदनमा कोरोना प्रभावित नेपाली श्रमिकहरुको उद्धारको लागि १ लाख ६५ हजार चार सय ४७ साउदी रियाल खर्च भएको जनाएको छ।

कोरोना महामारी लगायत विभिन्न कारणले अलपत्र परेका तथा रोजगार गुमाएर समस्यामा परेका १ सय ७ जनाका लागि कोरोना परीक्षण, ८२ जनालाई हवाई टिकटको व्यवस्था र ५ सय ३७ जनालाई खाद्यान्न उपलब्ध गराएको जनाएको छ भने
साउदीको विभिन्न शहरहरुमा आउटेज क्यामपिङ गरि पासपोर्ट सहजीकरणमा खर्च गरिएको संघले जनाएको छ ।

संघले नेपाली श्रमिको उद्धारको लागि आइएलओबाट प्राप्त गरेको रकम १ लाख ९९ हजार ६४३ साउदी रियाल अहिलेसम्म खर्च गरेको रकम १ लाख ६५ हजार ४ सय ४७ रियाल र अब संघको कोषमा ३४ हजार १९५ रियाल बाँकी रहेको समेत सार्वजनिक गरेको प्रतिवेदनमा उल्लेख गरिएको छ।

यस्तै संघले सत्य,तथ्य नबुझी दुस्प्रचार तथा भ्रामक समाचार सम्प्रेष्ण गरि अफवाह फैलाउनेप्रति खेद प्रकट गर्दै तत्काल छानबिन गरी कारवाही गर्न माग समेत गरेको संघले जारी गरेको विज्ञप्तिमा उल्लेख छ ।