काठमाडौँ– संसद् विघटन गर्ने सरकारको निर्णयलाई सर्वोच्च अदालतले बदर गरेपछि नेकपाको दाहाल-नेपाल समूहले काठमाडौँमा विजय जुलुस निकालेको छ ।

प्रतिनिधिसभा पुनस्स्थापना गर्ने सर्वोच्चको फैसला आएदेखि नै विजय जुलुस निकालेको दाहाल-नेपाल समूहले बुधबार काठमाडौंमा पनि विजय उत्सव मनाएको हो ।

शान्ति बाटिकाबाट सुरु भएको विजय जुलुस जमल, दरबारमार्ग, जयनेपाल हल, पुतलिसडक हुँदै राष्ट्रिय सभागृह अगाडि गएर सभामा परिणत हुनेछ ।

उक्त सभालाई अध्यक्षद्वय प्रचण्ड र नेपालले संवोधन गर्ने कार्यक्रम रहेको आयोजकले जनाएको छ । जुलुसमा नेताहरु जनार्दन शर्मा, नेतृ पम्फा भूसाल, अम्रित बोहरा, युवासंघका नेता रामप्रसाद सापकोटालगायत सहभागी छन् ।

यसअघि, मंगलबार साँझ यो समूहले दीपावली गरेको थियो ।

प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले पुस ५ गते प्रतिनिधिसभा विघटन गरेदेखि नै दाहाल-नेपाल समूहले संसद् पुनस्स्थापनाको माग गर्दै चरणबद्ध आन्दोलन गर्दै आएको थियो ।