काठमाडौँ– सर्वोच्च अदालतले संसद पुनःस्थापना गर्ने फैसला गरेसँगै विवेकशील साझा पार्टीका अध्यक्ष रविन्द्र मिश्रले उक्त निर्णयको स्वागत गरेका छन् ।

मिश्रले सामाजिक सञ्जालमा सर्वोच्चको फैसला जे हुनु पर्थ्यो, त्यहीँ भएको र तानाशाह बन्ने ओलीको प्रयास विफल भएको प्रतिक्रिया दिएका छन्।

सामाजिक सञ्जालमा उनले लेखेका छन्, ‘जे हुनु पर्थ्यो, त्यो भयो। सर्वोच्चको आजको फैसलाले दूरगामी ऐतिहासिक महत्व राख्नेछ । लोकतन्त्र र संविधानवादको चीरहरण गरेर लोकतान्त्रिक माध्यमबाटै तानाशाह बन्ने ओलीको प्रयास विफल भएको छ । तर नेपाली राजनीतिमा ओली प्रवृत्ति समाप्त भएको छैन। ओलीको विकल्प देउवा, प्रचण्ड हुन सक्दैनन्।’

यस्तै उनले अगाडी लेखेका छन्, ‘निर्णय जे सुकै आए पनि, प्रधानमन्त्री ओलीले विविध जटिलताका बाबजुद स्थिर देखिन थालेको नेपाली राजनीतिलाई अनावश्यक रूपमा भुङ्ग्रोमा जोतेका छन्। कुनै न कुनै समयमा चुनाव त भइहाल्नेछ। यो अपराधलाई नेपाली जनताले क्षमा नगरुन् भन्ने कामना गर्दछु।’