काठमाडौं- अर्थ मन्त्रालयले आगामी आर्थिक वर्षको बजेट निर्माणको काम शुरु गरेको छ ।

राष्ट्रिय योजना आयोगले दिएको सिलिङअनुसार बजेट निर्माणको काममा जुटेको मन्त्रालय अन्तर्गतको राजस्व परामर्श समितिले  वार्षिक बजेट तथा राजस्व नीति तथा कार्यक्रम तर्जुमाको काम समेत शुरु गरको छ ।

मन्त्रालयले बजेट निर्माणका क्रममा आगामी आर्थिक वर्षको आर्थिक ऐन तथा बजेट तर्जुमाका लागि बनाइने राजस्व नीति, भन्सार महसुल, मूल्य अभिवृद्धि कर, आयकर, अन्तःशुल्क, गैरकर तथा राजस्व चुहावटका विषयमा सुझाव समेत मागेको छ ।

विभिन्न १० वटा उपसमिति बनाएर सुझाव समेत संकलन गरिने र सुझाव अनुसार बजेट निर्माण गर्ने अर्थ मन्त्रालयले जनाएको छ ।

राष्ट्र बैंकले समेत यसैसाता बजेटमा समावेश गर्नुपर्ने विषयमा सरोकारवाला निकायसँग छलफल गरेको थियो । बैकले लिएको सुझाव समेटेर अर्थ मन्त्रालयलाई प्रतिवेदनका रुपमा हस्तान्तरण गर्नेछ ।