मुम्बई– बलिउडका कलाकारको व्यक्तिगत जीवन विवादविहिन छैन । कोही फ्यान त कोही अपरिचित व्यक्तिले यी कलाकारहरुलाई छोराछोरीदेखि आमासम्मको दाबी गर्दै मुद्धासमेत हालेका छन् ।

सन् २०२० मा प्रख्यात गायिका अनुराधा पौड्वाललाई एक ४५ वर्षीया महिलाले ‘आफू अनुराधाको छोरी हुँ’ भन्दै अदालतमा मुद्धा नै दर्ता गराइन् । सन् १९७४ मा तिरुअनन्तपुरममा जन्मिएकी करमाला मोडेक्सले केरलको जिल्ला अदालतमा अनुराधाविरुद्ध उजुरी गर्दै ५० करोड रुपैंयाँ जरिवानाको माग नै गरिन् ।

अनुराधाले आफूलाई जन्मिएको चार दिनपछि कोही अन्यलाई बुझाएको कुरा पिताले बताएको दाबी गरेकी थिइन् । तर अनुराधाले भने आफूमाथि लागेको यस्तो आरोपले कुनै अर्थ नलाग्ने बताएकी थिइन् ।

आन्ध्र प्रदेशमा बस्ने संगीत कुमार नाम गरेका एक व्यक्तिले अभिनेत्री ऐश्वर्या राय बच्चनलाई आफ्नो ‘आमा’ भनी दाबी गरे । बलिउडमा आउनु अघि ऐश्वर्याले आईवीएफका माध्यमबाट सन् १९८८ मा आफूलाई जन्म दिएको संगीतको दाबी थियो ।
ऐश्वर्यामाथि लागेको सबै आरोप झुठो साबित भएपछि प्रहरीले संगीतलाई पक्राउ गरेको थियो ।

अभिनेत्री ऐश्वर्या राय र अभिनेता अभिषेक बच्चनको विवाह निश्चित भएपछि जान्हवी कपूर नामकी एक मोडलले अभिषेक आफ्नो पति रहेको भन्दै अभिषेकको घर अगाडि गएर हातको नशा नै काटिन् । उनले अभिषेकको विवाह ऐश्वर्यासँग भएको आफूले हेर्न नसक्ने अडान लिएपछि प्रहरीले ती युवतीलाई ‘पागलपन’ भन्दै तुरुन्त पक्राउ गरेको थियो ।

अभिनेता राजकुमारकी छोरी वास्तविकता पण्डित अभिनेता शाहिद कपुरप्रति हुरुक्कै थिइन् । वास्तविकताले आफू शाहिदको पत्नी भएको दाबी नै गरिन् । शाहिद जहाँ–जहाँ जान्थे, वास्तविकता त्यही पुग्थिइन् । अन्तिममा केही उपाय नलागेपछि शाहिदले वास्तविकताविरुद्ध उजुरी नै दिनुपर्यो ।

दक्षिण भारतीय स्टार रजनीकान्तका ज्वाइँ धनुषलाई एक दम्पत्तिले आफ्नो छोरा दाबी गरे । धनुषले आफूहरुलाई छोडेर गएको उनीहरुको भनाई थियो । प्रहरीमा उजुरी दिएपछि उनीहरुले हरेक महिना ६५ हजार जरिवाना नै मागे । यो दाबीलाई सत्य साबित गर्नका लागि धनुषको मेडिकल टेस्ट पनि गराइएको थियो ।
–एजेन्सी