एजेन्सी- इरानले आफ्ना परमाणु केन्द्रमा संयुक्त राष्ट्रसंघको परमाणु अनुगमन गर्ने निकायका प्रतिनिधिलाई ‘आकस्मिक अनुगमन’ मा प्रतिबन्ध लगाउने भएको छ ।

इरानले मङ्गलबार निरीक्षणकर्तालाई दिइने पहुँचसम्बन्धी नीतिलाई परिवर्तन गर्न लागेको बीबीसीले जनाएको छ ।

सन् २०१५ मा भएको एउटा परमाणुसम्बन्धी सम्झौताबाट अमेरिका पछि हटेको तथा प्रतिबन्धहरू कायमै राखेकाले यो कदम चाल्न लागिएको इरानी अधिकारीहरूले जनाएका छन् ।

इरानले परिवर्तन गर्न लागेको नीतिले राष्ट्रसंघीय अनुगमनकर्ताहरूलाई थप तीन महिना आफ्ना परमाणु केन्द्रहरूको सीमित क्षेत्रमा मात्रै अनुगमन गर्न दिने तयारी गरेको छ ।

इरानले सन् २०१५ मा ६ वटा विश्व शक्तिसँग गरेको सम्झौता अनुसार रोकेको उसको परमाणु कार्यक्रम फेरि सुरु गरेको थियो।

इरानले अमेरिका उक्त सम्झौतामा पूर्ण रूपमा नफर्केसम्म आफ्नो कार्यक्रम नरोक्ने बताएको छ।

अमेरिकी राष्ट्रपति जो बाइडनले इरानले पहिले आफ्नो परमाणु कार्यक्रम स्थगित गर्नुपर्ने बताएका छन् । इरानको परमाणु कार्यक्रम झण्डै २० वर्षदेखि अन्तर्राष्ट्रिय मुद्दा बन्दै आएको छ।