काठमाडौँ– नेपाल चेम्बर अफ कमर्सले ७० औँ वार्षिकोत्सवका अवसरमा निबन्ध प्रतियोगिताको आयोजना गरेको छ ।
प्रतियोगितामा पत्रकारिता क्षेत्रमा अध्ययनरत २० जनाले सहभागिता जनाएको चेम्बरले जनाएको छ ।

चेम्बरका अध्यक्ष राजेशकाजी श्रेष्ठले प्रतियोगितामा सहभागीहरुलाई स्वागत गर्दै चेम्बरको उद्देश्य तथा उपलब्धिका बारेमा जानकारी दिएका थिए ।

उनले मुलुकको आर्थिक विकाशमा परम्परागत प्रणालीबाट अनलाइन व्यापारसम्म आउँदा राष्ट्रिय अर्थतन्त्रमा यसले पुर्‍याएको योगदानको चर्चा गरेका थिए ।

कार्यक्रममा वरिष्ठ पत्रकार कुबेर चालिसेले चेम्बरको गरीमामय इतिहास भएको बताए । यसैगरी पशुपति बहुमुखी क्याम्पसका प्रमुख चन्द्रप्रसाद पन्तले निजी क्षेत्र र सरकारी क्याम्पसबीच सामिप्यता नरहेको अवस्थामा चेम्बरले पब्लिक क्याम्पसका विद्यार्थीहरुलाई प्रतियोगितामा समावेश गरी नयाँ परम्परा शुरु गरेकोमा धन्यवाद दिए ।

प्रतियोगितामा सहभागीहरुले वाणिज्य क्षेत्रको जानकारी प्राप्त भएको र आगामी दिनमा आर्थिक पत्रकारिता क्षेत्रमा थप सहयोग मिल्ने बताए ।