काठमाडौँ– राष्ट्रिय महिला लिग फुटबलमा एपीएफले अपराजित रहँदै उपाधि जितेको छ ।

शुक्रबार भएको लिगको अन्तिम खेलमा त्रिभुवन आर्मीलाई ३–० गोल अन्तरले हराउँदै एपीएफ च्याम्पियन बनेको हो । त्रिपुरेश्वरमा रहेको दशरथ रङ्गशालामा भएको खेलमा एपीएफकी सरु लिम्बुले दुई र अनिता केसीले एक गोल गरेका थिए ।

एपीएफले १२ खेलमा ३६ अंक जोड्दा १२ खेलमा २६ अंक जोडेको आर्मी उपविजेता बन्यो ।

यसअघि शुक्रबार बिहान ललितपुरको सातदोबाटोस्थित एन्फा मैदानमा भएको खेलमा पुलिसले उदयपुरको चौदण्डीगढी नगरपालिकालाई १०–० गोल अन्तरले पराजित गरेको थियो ।

पुलिसको जितमा निरु थापाले चार गोल गरिन् । यस्तै निर्मला बिकले तीन, सुनकला राई र अमृता जैशीले एक-एक गोल गरेका थिए । पुलिसले एक गोल आत्मघाती उपहार पाएको थियो । चौदण्डीगढी अन्तिममा रहेको लिग सकाएको छ ।

उपाधि जितेको एपीएफले १५ लाख रुपैयाँ प्राप्त गरेको छ । उपविजेता बनेको आर्मीले ८ लाख, तेस्रो भएको पुलिसले ५ लाख र चौथो बनेको स्याङ्जाको वालिङ नगरपालिकाले ३ लाख रुपैयाँ प्राप्त गरेका छन् ।