काठमाडौं–चलचित्र पत्रकारहरुको छाता संस्था चलचित्र पत्रकार संघ नेपालको आयोजनामा बिहीबारबाट तीन दिने फोटोग्राफी तथा भिडियोग्राफी कार्यशाला सुरु भएको छ । चलचित्र विकास बोर्डमा सुरु कार्यशालामा ४० बढी पत्रकारको सहभागिता रहेको छ ।

कार्यशालाको शुभारम्भ गर्दै चलचित्र विकास बोर्डका अध्यक्ष दयाराम दाहालले कार्यशालाले पत्रकारहरुको क्षमता अभिवृद्धिमा सहयोग पुर्याउने बताए ।

राजनीतिक पत्रकारिता गर्नेहरुले चलचित्र पत्रकारितालाई कुनामा राख्ने गरेकोप्रति असन्तुष्टि जनाउँदै उनले चलचित्र पत्रकारिता राजनीतिक पत्रकारिताभन्दा अगाडि आउनुपर्ने जनाए ।

चलचित्र पत्रकार संघका अध्यक्ष दिनेश सिटौलाले कोरोना महामारीको समयमा पनि चलचित्र पत्रकारहरुले पत्रकारितालाई जारी राखेकोमा आभार व्यक्त गरे ।

नयाँ कार्यसमिति आएपछि व्यवसायिक चलचित्र पत्रकारितालाई प्रभावकारी बनाउन थुप्रै योजना बनाए पनि कोरोनाले सम्भव हुन नदिएको उनले बताए ।

कार्यशालामा हरी न्यौपाने, महेन्द्र विष्ट, विजय बस्याल, विष्णु कल्पित, राजन काफ्ले, दिनेश डिसी, दीपक गुरुङ, दीलिप थापा मगर, श्याम श्रेष्ठ र श्रीधर पौडेलले फोटोग्राफी र भिडियोग्राफीको बारेमा प्रशिक्षण दिनेछन् ।