काठमाडौं – अभिनेता तथा निर्माता दीपकराज गिरीले फिल्ममा सबै मेकर विद्यार्थी नै हुने धारणा राखेका छन् ।

मंगलवार काठमाडौंमा गरिएको फिल्म ‘प्रकाश’ को कार्यक्रममा बोल्दै गिरीले चलचित्रमा कोही पनि शिक्षक नहुने बताए ।

खरो टिप्पणी गर्ने अभिनेताका रुपमा चिनिने गिरीले गल्तीहरु नै आफ्ना शिक्षक भएको धारणा राखे । उनले भने, ‘चलचित्रमा सबैजना विद्यार्थी नै हुन्छ, शिक्षक कोही हुँदैन, सिक्ने क्रम कहिल्यै सकिँदैन । आफ्ना गल्तीहरु नै हाम्रा शिक्षक हुन् ।’

उनले मेकरले गल्तीबाट नयाँ पाठ सिक्ने पनि बताए । ‘मैले आफैले बनाएका चलचित्र पचासौँ गल्ती देख्छु, अरुले सयौँ गल्ती देख्छ, त्यही गल्ती नै हाम्रो गुरु हो,’ उनले भने ।

नेपालमा एकथरी मेकरले फिल्म विशुद्ध कलात्मक हुनुपर्ने भन्दै आएको र एकथरीले फिल्मले व्यापक नाफा कमाउनुपर्छ भन्दै आएको उनले बताए ।

‘हामी यतिञ्जेलसम्म दुई धारबाट बहस गरिरहेका छौँ । कोही फिल्म कलात्मक बनाउनुपर्छ भन्ने र कोही कलात्मकभन्दा फिल्मले व्यापार गर्नुपर्छ भन्नेमा बहस गरिरहेका छौँ, मलाई भने फिल्ममा कला र व्यापार दुवै हुनुपर्छ भन्ने लाग्छ,’ उनले भने ।