लसएन्जल्स–हलिउड अभिनेता ड्वेन जोनसनले पुनः एकपटक आफ्नो राजनीतिक महत्वाकांक्षालाई व्यक्त गरेका छन् । उनले आफ्नो पुरानो घोषणालाई पुनः दोहोर्याउदै अमेरिकी राष्ट्रपतिको चुनाव लड्ने इच्छा व्यक्त गरेका हुन् ।

अन्तर्राष्ट्रिय सञ्चारमाध्यमका अनुसार ‘फास्ट एण्ड फ्यूरियस’ अभिनेता ड्वेनले यदि जनताले चाहेमा आफू भविष्यमा हुने राष्ट्रपति निर्वाचनमा उम्मेद्वार हुने प्रतिबद्धता दोहोर्याएका छन् ।

‘मैले जे भनिरहेको छु, त्यो कुरा पुर्ण विश्वासका साथ भनिरहेको छु । सबै कुरा जनतामा नै निर्भर हुन्छ । त्यसकारण अहिलेका लागि म प्रतिक्षा गरिरहेको छु र मानिसहरु के चाहन्छन् भन्ने कुरा ध्यानपूर्वक सुन्दैछु’, उनले भनेका छन् ।

ड्वेनले केही वर्ष पहिले पनि राजनीतिमा आउने इच्छा व्यक्त गरेका थिए । पूर्व रेसलर ड्वेन हालका दिनमा आफ्नो नयाँ सिरिज ‘यंग रक’को प्रमोसनमा व्यस्त छन् । उनको सिरिज एनबीसीमा फेब्रुअरी १६ मा रिलिज हुँदैछ ।
–एजेन्सी