काठमाडौं – नेपालमा फाइभजी सेवा प्रयोग गर्नका लागि प्रयोगकर्ताहरु लामो समयदेखि प्रतीक्षामा छन् । नेपालमा पनि फाइभजीका लागि आवश्यक पर्ने फ्रिक्वेन्सी तय भएको छ ।

योसँगै नेपालमा फाइभजी सेवा विस्तारको बाटो खुलेको छ । यद्यपि यसका लागि भने केही समय लाग्नेछ ।

विश्वका ६१ देशमा भने फाइभजी सेवा शुरु भइसकेको छ । ग्लोबल मोबाइल सप्लायर्स एसोसिएसनको रिपोर्ट अनुसार जनवरी २०२१ सम्ममा विश्वका ६१ देशका १ सय ४४ अपरेटरले कमर्सियल फाइभजी सर्भिसको शुरु गरिसकेका छन् ।

अन्य केही देश पनि आफ्नो देशमा फाइभजी सेवा शुरु गर्न लागिपरेका छन् । अहिले विश्वभर फाइभजी टेस्टिङ र ट्रायलको प्रक्रिया चलिरहेको छ ।

छिमेकी मुलुक भारतमा पनि फाइभजी शुरु हुने प्रक्रियामा रहेको छ । भारत सरकारले फाइभजीका लागि आवश्यक पर्ने इन्फ्रास्टक्चर विकास गरिरहेको छ ।

फाइभजी पछिल्लो समयको द्रुत गतिको इन्टरनेट सेवा हो । यो इन्टरनेट हामीले अहिले प्रयोग गरेको इन्टरनेटको तुलनामा निकै स्पिडमा चल्छ ।

फाइभजीको स्पिड प्रतिसेकेन्ड २० गिगाबाइटसम्म हुने बताइएको छ । यसका लागि फाइभजी सपोर्ट गर्ने डिभाइसको आवश्यक पर्छ ।