मुम्बई– फिल्म ‘बाहुबली’ फेम्ड निर्देशक एसएस राजामौलीको प्रतिक्षित फिल्म ‘आरआरआर’लाई लिएर एक नयाँ खबर बाहिर आएको छ । खबरअनुसार यो फिल्मका लागि अभिनेत्री आलिया भट्टले आफ्ना लागि दुई गीत गाउनेछिन् ।

आलियाले यसअघि इम्तियाज अलीको फिल्म ‘हाइवे’ र शशांक खेतानको फिल्म ‘हम्प्टी शर्माकी दुल्हनिया’मा गीत गाइसकेकी छन् ।

दक्षिण भारतीय फिल्मका सुपरस्टार राम चरण र जुनियर एनटीआर अभिनित फिल्ममा आलियाले एक गीत र एक डान्सिङ नम्बरमा आफ्नो स्वर दिनेछिन् । फिल्मको हिन्दी भर्सनका लागि उनले दुई गीत गाउनेछिन् ।

यो फिल्म हिन्दी, तेलुगू, तमिल, मलयालम र कन्नड भाषामा अक्टोबर १३ मा रिलिज हुँदैछ ।

फिल्ममा अजय देवगन, श्रीया सरन र आलियाको पनि अभिनय रहनेछ । निर्माता डीवीवी दानय्याले फिल्मको सुटिङ तालिका अन्तिम अवस्थामा पुगेकाले दर्शकमाझ ल्याउनका लागि उत्साहित भएको बताए ।

फिल्म युनिट हाल क्लाइमेक्सको छायांकनमा व्यस्त छ । फिल्मको बजेट ४ सय ५० करोड रुपैंयाँ रहेको छ ।
–एजेन्सी