काठमाडौँ- नेकपा ओली समूहका स्थायी कमिटी सदस्य तथा उद्योग, वाणिज्य एवं आपूर्ति मन्त्री लेखराज भट्टले पुष्पकमल दाहाल ‘प्रचण्ड’लाई ‘लालगद्धार’को आरोप लगाएका छन ।

शनिबार पूर्वजनमुक्ति सेना नेपाल केन्द्रीय संयोजन समिति बुटवलद्वारा आयोजित राष्ट्रिय भेलालाई सम्बोधन गर्दै मन्त्री भट्टले यस्तो आरोप लगाएका हुन ।

उनले भने, ‘वर्षौंदेखि प्रचण्डकै पछि-पछि लागेर मुलुकका लागि जनयुद्ध लड्यौँ । कैयौँले ज्यान गुमाए । तर, अहिले ती सबै बिर्सेर प्रचण्ड सुखसयल, पद र परिवारमा केन्द्रित भएका छन । अहिले पदकै लोभमा विरोध शुरू गरेर हिँडेपछि साथ छाड्नुपर्यो ।’

सम्बोधनकै क्रममा प्रधानमन्त्री केपी शर्मा ओलीमा पनि ‘प्रचण्ड प्रवृत्ति’ देखा परे साथ छाड्ने बताए ।

‘प्रचण्ड’ले पार्टीप्रति गद्धारी गरेपछि उनको साथ छाडेर केपी ओलीलाई साथ दिएको बताउँदै ओलीमा त्यस्तै प्रवृत्ति देखिए साथ छाड्ने संकेत गरेका हुन् ।

मन्त्री भट्टले भने, ‘प्रधानमन्त्री ओलीमा प्रचण्ड प्रवृत्ति नदेखिएको र यदि त्यस्तो देखिएमा ओलीको साथ छाड्न कुनै आइतबार कुर्दिनँ ।’