काठमाडौं–नेवार सुन्दरीहरुको सौन्दर्य प्रतियोगिता ‘मिस नेवाः नेपाल’ एक साता पछि सरेको छ । आगामी फागुन ७ गते कमलादीस्थित नेपाल प्रज्ञा प्रतिष्ठानमा आयोजकले फिनाले गर्ने तयारी गरे पनि सोहीदिन परेको प्रजातन्त्र दिवसका एक साताका लागि पछाडि सरेको हो ।

नेप्लिज फेशन होमले आयोजना गर्दै आएको १५ औं संस्करणको यो प्रतियोगिता अब फागुन १५ गते हुनेछ । होमकी अध्यक्ष हेमा मानन्धरले प्रधानमन्त्री केपी शर्मा ओलीको सहभागितामा प्रजातन्त्र दिवस सम्बन्धी कार्यक्रम प्रतिष्ठानमा तोकिएकाले ‘मिस नेवाः नेपाल ११४१’ एकसाता पछि सारिएको बताइन् ।

प्रतियोगिताको शीर्ष उपाधिका लागि १५ जना नेवार सुन्दरीहरु अन्तिम प्रतिष्पर्धामा छन् । नेप्लीज फेसन होमले डेढ दशकदेखि नेवार समुदायका युवतीहरुका लागि ‘मिस नेवाः नेपाल’ आयोजना गर्दै आएको छ । होमले नेवार समुदायका बालिकाहरुका लागि ‘लिटिल मिस नेवाः’ पनि आयोजना गर्दै आएको छ । अध्यक्ष मानन्धरले नेवार समुदायको कला, भाषा र संस्कृतिलाई जीवन्त राख्न प्रतियोगिता आयोजना गरिएको बताईन् ।