मुम्बई(एजेन्सी)–अभिनेता राहुल रोय भन्नासाथ हरेक दर्शकको दिमागमा फिल्म ‘आशिकी’को याद आउछ । यो फिल्मको गीत ‘नजर के सामने, जिगर के पास, कोई रहता है’ले राहुललाई रातारात स्टार बनाइदियो ।

सन् १९९० मा निर्माण भएको फिल्म ‘आशिकी’मार्फत फिल्ममा डेब्यू गरेका राहुलले आफ्नो लुक्स र मुस्कानले दर्शकलाई मोहित बनाएका थिए । तर राहुलको भाग्य जति छिटो चम्कियो, त्यति नै छिटो गतिमा उनी फ्लप पनि भए । पहिलो फिल्मबाहेक उनको अरु कुनै पनि फिल्मले बक्सअफिसमा सफलताको स्वाद चाख्न पाएनन् ।

यिनै राहुल मंगलबार आफ्नो ६३ औं जन्मदिन मनाउदैछन् । कलेजको दिनमा राहुल दिल्लीमा मोडलिङ गर्दथे । उनी व्यापारिक पारिवारिक पृष्ठभूमिबाट आएका थिए । उनी आमा पत्रिकामा लेख लेख्थिइन् । एकपटक उनको लेख पढेपछि निर्देशक तथा निर्माता महेश भट्ट आमालाई भेट्न राहुलको घर पुगे । घरमा पुग्दा राहुलको तस्बिर देखेपछि महेशको ध्यान राहुलतिर मोडियो । महेश घरमा पुग्दा राहुल नभएपछि महेशले राहुललाई फोन सम्पर्क गरे ।

जब राहुल महेशलाई भेट्न उनको अफिस पुगे, त्यही समयमा महेशले राहुललाई ‘आशिकी’को अफर गरे । त्यसपछि राहुलले फिल्मका लागि अभिनय सिके । राहुलले पहिलो फिल्म फ्लप हुन्छ भन्ने सोचेका थिए । तर परिणाम ठिक विपरित निस्कियो । यो फिल्म बक्सअफिसमा सुपरहिट भएपछि राहुल ८ महिनासम्म बेरोजगार भए । ८ महिनापछि भने राहुलको हातमा झण्डै ६० फिल्मको प्रस्ताव आयो ।

राहुलले करिब ४७ वटा फिल्म एकसाथ साइन गरे । पुनः खाली नबस्नुपरोस् भन्नकै लागि उनले ती सबै फिल्ममा हस्ताक्षर गरे । ‘आशिकी’ हिट भएपछि उनको २५ फिल्म पूर्ण रुपमा फ्लप भयो ।

यसपछि उनले सन् १९९२ मा महेशकै फिल्म ‘जुनून’मा अभिनय गरे । यो फिल्ममा उनले निभाएको भिलेन चरित्रले दर्शक चकित भए । मूलधारको फिल्ममा आफ्नो करियर डुब्दै गरेको देखेपछि राहुलको नजर भोजपुरी फिल्म तिर पुग्यो । तर त्यहाँ पनि उनी सफल हुन सकेनन् । उनले ‘बी’ र ‘सी’ ग्रेडका फिल्ममा पनि अभिनय गरे । कतैबाट पनि आफ्नो करियर अगाडि नबढेपछि उनी विस्तारै फिल्मबाट टाढिए ।

उनको व्यक्तिगत जीवन पनि उतारचढावपूर्ण नै रह्यो । उनको अफेयर महेशकी जेठी छोरी तथा अभिनेत्री पूजा भट्टसँग भयो । तर दुवैले कहिले पनि आफ्नो सम्बन्धलाई स्वीकारेनन् । पूजा पछि उनको जिन्दगीमा मनिषा कोइराला आइन् । तर राहुल आफ्नो गिर्दो करियरबाट चिन्तित थिए ।

जसकारण मनीषासँग उनको सम्बन्ध लामो टिकेन । त्यसपछि उनले मोडल राजलक्ष्मी खानविलकरसँग विवाह गरे । तर त्यो विवाह पनि लामो समय टिकेन । टेलिभिजन रियालिटी शो ‘बिग बोस १’मा पनि सहभागिता जनाइसकेका राहुल अहिले सानातिना फिल्मका निर्माता बनेका छन् ।