काठमाडौँ— नेकपा (ओली) समूहका सचिवालय सदस्य तथा उपप्रधानमन्त्री ईश्वर पोखरेलले जनताभन्दा ठूलो न्यायाधीश अर्को हुन नसक्ने बताएका छन् । उनले भने, ‘ताजा जनादेशमा गएर जनताको निर्णय स्वीकार गर्न चाहन्छौँ ।’

पोखरेलले राजधानीको दरबार मार्गमा भइरहेको बृहत् जनसभामा बोल्दै उक्त कुरा बताएका हुन् । उनले पाँच वर्षका लागि निर्वाचित प्रधानमन्त्री तथा महाधिवेशनबाट निर्वाचित अध्यक्षलाई षड्यन्त्र गरेर बीचमै अपदस्थ गर्न खोजेपछि निर्वाचनमा जानु परेको बताए । उनले प्रधानमन्त्री ओलीको संकल्पअनुसार राजनीतिक स्थायित्वलाई निरन्तरता दिने पनि बताए ।

पोखरेलले आधिकारिक नेकपा ओलीले नेतृत्व गरेको नेकपा नै हुने र सूर्य चिह्न पनि उसकै हुने ठोकुवा गरे । उनले भने, ‘प्रधानमन्त्री केपी शर्मा ओलीले नेतृत्व गरेको नेकपाको आधिकारिकता कसैले तोड्न सक्दैन ।’