काठमाडौँ– एक अभिनेता तथा अभिनेत्रीका लागि फिल्म रिलिजको दिन महत्वपूर्ण दिन मानिन्छ ।

किनकी फिल्म रिलिजपछि प्राप्त दर्शक प्रतिक्रिया र बक्सअफिस कलेक्सन उसका लागि चासोको विषय रहन्छ । तर त्यही अभिनेता वा अभिनेत्री अभिनित दुई फिल्म एकैदिन रिलिज भयो भने उनीहरुका लागि त्यो भन्दा ठूलो केही हुँदैन ।

अभिनेता पुष्प खड्काका लागि यस्तै तनाव आइलागेको छ । किनकी आगामी चैत २७ गते उनी अभिनित दुई फिल्म ‘कृष्ण लीला’ र ‘मनसँग मन’ रिलिज हुँदैछ । फिल्म ‘मनसँग मन’ले यसअघि नै चैत २७ लाई रिलिज बुक गरिरहँदा ‘कृष्ण लीला’ले मंगलबार सोही मितिमा रिलिज घोषणा गरेको छ ।

दीपक ओली निर्देशित यो फिल्ममा रोहित कट्टेल प्रस्तुतकर्ता छन् । आरआर फिल्म प्रोडक्शनको ब्यानरमा निर्मित फिल्मको कार्यकारी निर्माता रत्न श्रेष्ठ हुन भने निर्मातामा प्रकाश कार्की र केवल तामाङ छन् ।

फिल्ममा पुष्पसँगै श्रद्धा क्षेत्री, बुद्धि तामाङ, रवीन्द्र झा, नवीन रेग्मी, हिउँवाला गौतम, भावना गुरुङ, आयुष गुरागाईलगायतका कलाकारको अभिनय छ ।

फिल्ममा पत्रकार लक्ष्मण सुवेदीको कथा, पटकथा, शिव ढकाल र बाबु श्रेष्ठको छायांकन, अर्जुन पोखरेलको संगीत, रामजी लामिछानेको कोरियोग्राफी र श्री श्रेष्ठको द्वन्द्व छ । फिल्म पूर्वी नेपालको पाँचथर, इलाम, झापालगायतका जिल्लामा छायांकन गरिएको छ ।