काठमाडौं– नेपालको जनसंख्याको २५ प्रतिशत मानिसमा कुनै न कुनै किसिमको मानसिक स्वास्थ्य समस्या रहेको चिकित्सकहरू बताउछन् ।

नेपालमा सबैभन्दा धेरै डिप्रेसनका बिरामी रहेको रिदम न्युरो-साइकियाट्री हस्पिटल एण्ड रिसर्च सेन्टरका निर्देशक एवं मानसिक रोग विशेषज्ञ डा रितेश थापाले बताए ।

मानसिक स्वास्थ्य समस्याका कारण अस्पतालमा आउने बिरामीमध्ये १० प्रतिशतमा कडा खालको मानसिक स्वास्थ्य समस्या हुने गरेको डा. थापाले बताए ।

‘मानसिक रोग धेरै किसिमका हुन्छन् । मानसिक रोगका बिरामीहरु सुरुमै उपचारमा आउँने हो भने काउन्सिलिङले मात्रै पनि धेरै समस्या कम गर्न सकिन्छ,’ डा. थापाले भने, ‘तर धेरैजस्तो बिरामीहरू ढिलो उपचारमा आउँछन् । मानिसक रोगको उपचार जति छिटो पहिचान हुन्छ त्यति नै छिटो उपचार हुन्छ ।’

ढिला गरी उपचारमा आउँदा मानिसमा उनीहरूमा कडा खालको मानसिक समस्या भइसकेको हुने र उपचारमा समय लाग्ने डा. थापाको भनाइ छ ।

डा. थापाका अनुसार कडा खालको मानसिक रोगीमा यस्ता लक्षण देखिन्छन्।
-असामान्य व्यवहार गर्ने ।
-नभनेका कुराहरु सुन्ने ।
-आत्महत्याको भावना उत्पन्न हुने ।

सामान्य खालको मानसिक स्वास्थ्य समस्यामा मनोचिकित्सकको काउन्सिलङबाट पनि रोग निको हुने डा थापाको भनाइ छ । तर मानिसमा कडा खालको स्वास्थ्य समस्या देखिएपछि मात्रै उपचारको आउने गरेको डा. थापाले बताए ।

यस्ता छन् मानसिक समस्याका लक्षण
-मन डराउने ।
-निद्राको समस्या हुने ।
– भिडभाडमा जान बोल्न डराउने ।
-उदास हुने ।
-लामो समय सम्म टाउको दुख्ने ।